ARFI ATIBUA MZIMU WA SERIKALI TATU

 

MJUMBE wa Bunge Maalum la Katiba, Said Arfi (CHADEMA), jana alitimua hali ya hewa bungeni baada ya kugusia muundo wa Serikali tatu unaopendekezwa na rasimu ya katiba, akihoji wajumbe walio wengi wanatoa wapi mamlaka ya kujitia upofu na kuingiza muundo wa serikali mbili.

Arfi ambaye pia ni mbunge wa Bunge la Jamhuri ya Muungano kutoka Jimbo la Mpanda Mjini, aliwatibu wajumbe wenzake wakati akisoma mapendekezo ya wajumbe walio wachache katika kamati namba kumi kuhusu sura ya kumi na moja na kumi na tano.

Muda mfupi baada ya Arfi kufika mbele kwaajili ya kusoma taarifa yake, Mwenyekiti wa Bunge hilo, Samuel Sitta alimtania akimuuliza kama bado ana msimamo wake wa kutaka kufungua kesi Mahakama Kuu kupinga Bunge la Katiba.

Arfi kwa kujiamini alisema ndiyo, na kwamba sasa anashawishika zaidi baada ya kuona wajumbe walio wengi wakijiba mamlaka ya kubadili maudhui ya msingi ya mapendekezo ya wananchi kwenye rasimu yanayotaka muundo wa serikali tatu.

Kabla ya kuanza kusoma maoni yake, Arfi alieleza kushangazwa na hatua ya mjumbe mwenzake, Mohammed Seif Khatib aliyesoma maoni ya wengi kwa kuwataja kwa majina wajumbe wengine wa UKAWA huku akijua kwamba hawakushiriki katika mjadala huo, akisema ni kuwapotosha wananchi.

Ghafla, Khatib alisimama na kumpa taarifa akisema kuwa aliwataja akimaanisha kwamba ni wajumbe wa kamati namba kumi bila kujali kama wapo au hawapo bungeni.

Baada ya majibizano hayo, Arfi alianza kusoma maoni ya wachache huku akirejea historia ya chimbuko la vuguvugu la serikali tatu na kuhoji ni kwanini wajumbe walio wengi wanajitia upofu na kufuta ibara zinazotaja maneno ya nchi washirika na serikali ya Tanganyika.

Hatua hiyo ilimfanya Sitta kuingilia kati akimtaka mjumbe huyo ajielekeze kwenye hoja badala ya kurejea kujadili suala la idadi ya serikali kwa kuwa lilishamalizika, jambo ambalo Arfi alihoji ni kwanini kila inapotajwa serikali tatu, walio wengi wanakereka na kujitia vipofu.

Kauli hiyo ya neno vipofu, ilimwinua mjumbe kutoka kundi la 201 anayewakilisha watu wenye ulemavu (wasioona), Amoni Mpanju, akimtaka Arfi afute maneno hayo kwa kuwa yanakera na kuwadhalilisha wasioona kwamba hawana akili kama wale wanaoona.

Mpanju alishangiliwa na wajumbe wengi, huku baadhi ya sauti za wanawake zilisikika zikisema “UKAWA huyo aliyebaki humu ndani na serikali tatu…afute kauli”.

Hata hivyo, Arfi aliomba radhi na kufuta kauli hiyo akisema kuwa hakuwa na maana hiyo kwani neno hilo limo katika kamusi ya Kiswahili sanifu, kisha akaendelea kusoma taarifa yake hadi mwisho.

Tanzania Daima

TOA MAONI YAKO HAPA CHINI