PINGAMIZI DHIDI YA MBOWE NI HEWA

 

MKURUGENZI wa Oganaizesheni, Mafunzo na Uratibu wa Kanda wa Chama Cha Demokrasia na Maendeleo (CHADEMA) Benson Kigaila, amesema ofisi ya Katibu Mkuu wa chama hicho haijapokea pingamizi lolote kutoka kwa mgombea wa nafasi yoyote dhidi ya mwenzake.

Majibu ya Kigaila yamekuja siku moja baada ya vyombo vya habari na mitandao ya kijamii kumkariri mgombea wa nafasi ya mwenyekiti Taifa wa CHADEMA, Kansa Mbarouk, akidai kwamba amepeleka barua ya kumwekea pingamizi la kugombea nafasi hiyo dhidi ya mwenyekiti wa sasa wa chama hicho, Freeman Mbowe.

Akizungumza na waandishi wa habari jana, Kigaila alisema hadi juzi saa tano usiku alipotoka ofisi za makao makuu ya chama hicho, hakukuwa na barua yoyote iliyohusu pingamizi lolote, iliyofikishwa katika Ofisi wa Katibu Mkuu wa chama hicho Dk. Willibrod Slaa.

“Hakuna barua yoyote iliyoletwa katika ofisi za Katibu Mkuu …nafikiri walioomba kuchaguliwa nafasi yoyote katika chama na baraza wanafahamu kuwa kama wana pingamizi lolote wanapaswa kulipeleka kwa Katibu Mkuu wao,” alisema Kigaila.

Kigaila aliwataka wagombea kusoma vizuri katiba na kanuni za chama na mabaraza yao ili kujiweka vizuri katika kipindi hiki cha uchaguzi unaoendelea katika chama chao.

Katika pingamizi lililodaiwa kupelekwa katika ofisi za CHADEMA Makao Makuu, Ofisi za Msajili wa Vyama vya Siasa na Mhakamani, Mbarouk anasemekana kudai kuwa Mbowe, kwa kugombea ueneyekiti, amekiuka katiba ya chama hicho na maagizo ya Msajili wa Vyama vya Siasa nchini.

Vyombo vya habari jana vilinukuu barua ya Mbarouk yenye kumbukumbu namba Mbarouk/UCH/14 inayodaiwa kwenda kwa Katibu Mkuu wa CHADEMA na Msajili wa Vyama vya Siasaikisema kuwa hadi Septemba 14 siku ya uchaguzi mkuu wa chama hicho, Mbowe atakuwa ametumikia vipindi viwili katika nafasi ya mwenyekiti wa taifa.

“Msajili wa vyama alikuwa ametoa maelekezo kwamba chama kiitishe Baraza Kuu na Mkutano Mkuu Maalumu kwa lengo la kubadilisha kipengele kinachoweka ukomo wa uongozi kama litaona kuna haja hiyo kabla ya kufanyika uchaguzi mkuu. Hata hivyo hadi naandika barua hii hakuna dalili zozote kwamba mkutano mkuu maalumu utaitishwa na maandalizi ya uchaguzi yanaendelea bila kujali agizo la msajili wa vyama,” alilikaririwa Mbarouk katika barua hiyo.

Hata hivyo hoja, ambayo imekuwa ikkibuliwa na baadhi ya wanachama walioondolewa kwenye chama au uongozi kwa sababu mbalimbali, ilishajibiwa na CHADEMA, kupitia kwa Mkurugenzi wa Habari na Mawasiliano, John Mnyika, mwanzoni mwa mwezi Julai mwaka huu.

Alisema Agosti 13 mwaka 2006, CHADEMA ilifanya marekebisho makubwa ya katiba, bendera na kadi za chama hicho na kufuta katiba ya 2004, bendera na kadi zilizokuwa zinatumika wakati huo.

Katika mkutano huo kulifanyika mabadiliko ya kifungu cha 6.3.2 c kilichokuwa kinaweka ukomo wa uongozi, hivyo kusomeka kuwa, “kiongozi anayemaliza muda wake ana haki ya kugombea tena ilimradi awe amekidhi masharti ya kuchaguliwa ambayo yameainishwa kwenye kanuni za chama kifungu cha kumi.”

Aliongeza kuwa Mbowe na Dk. Slaa bado wanazo sifa kama wakitaka kugombea kwa mujibu wa katiba, kanuni, maadili na itifaki za chama, na kwamba wala si kwa mujibu wa matamshi ya msajili wa vyama.

“Wenye kujua nani ana sifa ya kugombea na nani hana, maamuzi hayo hutolewa na mkutano mkuu na Baraza Kuu la chama kwa mujibu wa katiba wala hawafanyi hayo kwa maelekezo ya msajili,” alisema Mnyika, ambaye anafahamu vema suala hilo, kwani alikuwa katibu wa kamati iliyoandika katiba mpya, baada ya kukusanya maoni ya wanachama kutoka wilayani na mikoani kuhusu marekebisho ya katiba.

“Hatua hiyo ilifuata baada ya waraka uliosambazwa nchi nzima kukusanya maoni ya wanachama, hivyo suala la marekebisho ya katiba haikuwa hoja ya Mbowe wala Dk. Slaa,” alisisitiza.

Wafuatiliaji wa masuala ya siasa ndani ya CHADEMA wanasema pingamizi hilo hewa ni sehemu ya hujuma zinazopangwa na mahasimu wa chama hicho kama jaribio la kuharibu uchaguzi mkuu unaoendelea sasa.

CCM na vyama vinavyopambana na CHADEMA, hasa vinavyoundwa na wafuasi za zamani wa chama hicho waliovuliwa uanachama au kuachishwa uongozi, vinaogopa uwezo wa Mbowe katika kuongoza chama hicho, na vinadhani kwamba ni rahisi kujipenyeza na kuhujumu iwapo Mbowe hatakuwa kiongozi.

Uchunguzi wa gazeti hili umebaini kuwa hata ofisi ya msajili wa vyama vya siasa imekuwa ikusumbuliwa na mamlaka za serikali ili msajili ahakikishe Mbowe hagombei uongozi katika CHADEMA kwa sababu yoyote.

Hata hivyo, baadhi ya maofisa waandamizi wa Ofisi ya Msajili wa Vyama vya siasa wameliambia gazeti hili kuwa ofisi hiyo itashinda hila na vishawishi hivyo.

Tanzania Daima

TOA MAONI YAKO HAPA CHINI