MATUKIO ya kigaidi yanayotokea maeneo mbalimbali duniani
likiwamo lile la hivi karibuni lililotokea katika maduka ya biashara ya
Westgate nchini Kenya yamelitisha Bunge la Jamhuri ya Muungano wa
Tanzania na kuamua kufunga vifaa vingi vya ulinzi.
Majengo mbalimbali ya Bunge hivi sasa yamefungwa vifaa hivyo, hali
iliyosababisha usumbufu kwa baadhi ya wabunge, wafanyakazi, waandishi
wa habari na watu waliozoea kuingia kwenye ofisi husika pasipo ukaguzi
unaofanyika sasa.
Awali vifaa vingi vya ukaguzi vilikuwa vimefungwa kwenye mageti ya kuingilia na katika baadhi ya milango ya ukumbi wa Bunge.
Marekebisho hayo pia yanakwenda sambamba na utoaji wa vitambulisho
vya kufungulia milango, ambavyo vinagawiwa kwa watu wanaofanya shughuli
katika majengo hayo, huku wageni wanaotembelea maeneo hayo watapaswa
kuongozwa na maofisa wenye vitambulisho hivyo ili waingie wanakotaka
kwenda.
Tanzania Daima Jumatano lilishuhudia marekebisho makubwa kwenye ofisi
mbalimbali za Bunge, ambazo zimewekewa milango ya kufunguka yenyewe
kila mtu anapoikaribia, kuwekwa mazulia mapya, meza na viti vipya.
Tanzania Daima Jumatano liliwasiliana na Mkurugenzi wa Habari, Elimu
kwa Umma na Itifaki, Jossey Mwakasyuka, kujua sababu za marekebisho
hayo makubwa, ambapo alisema matukio ya kigaidi yamelifanya Bunge
lichukue tahadhari.
Mwakasyuka alisema usalama kwenye maeneo ya Bunge ni jambo
linalopaswa kupewa umuhimu wa kipekee, kwa kuwa Tanzania ni sehemu ya
dunia inayoandamwa na matukio ya kigaidi.
“Hapa bungeni ni eneo nyeti sana, kuna maofisa wengi wa serikali,
mawaziri, wabunge, waandishi wa habari na wageni mbalimbali, Waswahili
husema kinga ni bora kuliko tiba, tumeanza kuchukua tahadhari dhidi ya
ugaidi,” alisema.
Alisema magaidi wamekuwa wakilenga maeneo yenye mikusanyiko mikubwa
ya watu na Bunge ni sehemu inayokusanya watu wa aina mbalimbali
wanaohitaji ulinzi mkubwa.
Alisema mashine za ukaguzi zilizofungwa hivi sasa zina uwezo wa
kubaini vifaa vinavyoweza kutumika kudhuru watu au mali zilizopo kwenye
eneo la Bunge au sehemu nyingine iliyolengwa.
Aliongeza kuwa Bunge limechukua hatua hiyo pia kutokana na kukua kwa
teknolojia ya kisasa, ambapo kila wakati wahalifu wamekuwa wakiboresha
uhalifu wao kwa kutumia teknolojia.
Mwakasyuka alisema Tanzania imeshaanza kuchukua hatua za kujihadhari,
ambapo hivi sasa kwenye maduka, ofisi za umma na mikusanyiko
mbalimbali kuna mashine za ukaguzi pamoja na upekuzi wa kina kulingana
na mazingira husika.
“Haya mliyoyaona hivi sasa siku zijazo yatakuwa zaidi, maana
tunalenga kuzuia uhalifu ambao unashamiri kila kukicha, wahalifu
hatutaki kuwapa fursa ya kupenya kwenye maeneo yetu,” alisema.
Mwezi uliopita watu wanaodaiwa kuwa ni magaidi wa kikundi cha Al-
Shabaab cha nchini Somalia walivamia katika maduka ya biashara ya
Westgate na kuua kwa risasi watu wasiopungua 70 na kujeruhi 200.
0 comments:
Post a Comment