MWANAFUNZI AUAWA KIKATILI MBEYA

 

Kamanada wa Polisi mkoa wa Mbeya, Diwani Athuman

MWANAFUNZI wa Shule ya Sekondari  Katenga, wilayani Mbarali,  Hans Mbogo (17), kidato cha tatu, amekutwa amefariki dunia na mwili wake kutupwa kichakani katika Kitongoji cha Itange, Kijiji cha Madabaga wilayani Mbarali.

 Tukio hilo lilitokea Agosti 19 mwaka huu katika kijiji hicho na taarifa za awali zinaeleza kuwa mwanafunzi huyo aliuawa na watu wasio julikana na mwili wake kutelekezwa katika vichaka hivyo.

Hata hivyo kwa mujibu wa taarifa ya Polisi mkoani hapa, zinaeleza kuwa Agosti 19, majira ya saa 12 jioni, mwanafunzi huyo akiwa nyumbani kwake na pipipiki (bodaboda) yake aina ya  T-Better, yenye namba za  usajili T263 BZC, alikodishwa na watu wasiojulikana na kumtaka awapeleke katika kijiji jirani.

Taarifa zinaeleza kuwa baada ya kukodishwa na watu hao ambao inasadikiwa ni majambazi, hakurudi nyumbani na mwili wake ulikutwa siku ya pili, Agosti 20, mwaka huu vichakani ukiwa na matundu yanayohisiwa kuwa ni ya risasi.

Kamanada wa Polisi mkoani Mbeya, Diwani Athuman, alisema mwili wa marehemu umefanyiwa uchunguzi na umeshakabidhiwa kwa ndugu, tayari kwa mazishi.

Alisema jeshi lake bado linawasaka wahusika na kuwataka wenye taarifa zozote kuhusiana na mauaji hayo wazitoe kwenye mamlaka husika.

Chanzo: Tanzania Daima

TOA MAONI YAKO HAPA CHINI