UGANDA: MASHOGA, WASAGAJI KUFUNGWA MAISHA

 

 Muingereza David Cicil gerezani kwa madai ya tamthilia chafu

Uganda imepitisha muswada unaopinga mapenzi ya jinsia moja na

iwapo Rais Yoweri Museveni ataidhinisha sheria hiyo inamaanisha atakayepatikana na hatia atahukumiwa kifungo cha maisha gerezani.

Muswada huo uliopitishwa na bunge siku ya Ijumaa halikadhalika unasema mtu yeyote aliye na taarifa za watu wanaoshiriki mapenzi ya jinsia moja na kushindwa kuripoti habari hizo kwa maafisa wa polisi atafungwa gerezeni maisha.

Wakati huo huo bunge hilo hilo la Uganda siku ya Alhamisi liliidhinisha muswada unaopiga marufuku maonyesho ya picha chafu.

Mswada huo unaharamisha kitu chochote kitakachoonyesha sehemu nyeti kama vile matiti, mapaja, makalio au tabia yoyote inayozua uchu wa mapenzi.

Kulingana na mswada huo, sheria iliyopo sasa kuhusu picha chafu haihusu zaidi picha hizo bali linahusu uchapishaji, mawasiliano, taarifa, burudani, maonyesho katika kumbi za kuigizia, miziki inyochezwa katika vyombo vya habari, densi, sanaa, mitindo na picha za runinga.

Mapema mwaka huu Waziri wa maadili wa Uganda, Simon Lokodo, alipendekeza kuwa mwanamke yeyote anayevalia nguo ambayo inafika juu ya magoti anatakiwa kukamtwa na kuadhibiwa kisheria.

Mswada huo unahitaji kuidhinishwa na Rais kabla ya kufanywa sheria.

Uganda ni nchi inayoshikilia mawazo ya kihafidhina yaani isiyopendelea mageuzi katika mawazo na inaandaa sheria ya kuwaadhibu wanaoshiriki mapenzi ya jinsia moja ikijumuisha hukumu ya kifo katika baadhi ya kesi.

BBCSwahili 

TOA MAONI YAKO HAPA CHINI