WATU WAWILI WAUAWA RUVUMA

 

Na Gideon Mwakanosya Songea

 Watu wawili wamepoteza maisha kwa nyakati tofauti mkoani Ruvuma ambapo tukio la kwanza linamhusisha mwanamke mmoja na la pili ni la mwanafunzi kuuawa na mwanafunzi mwenzake.

Katika tukio la kwanza, mwanamke mmoja Agatha Honde (55) mkazi wa mtaa wa Nonganonga kata ya Mletele katika Halmashauri ya Manispaa ya Songea Mkoani Ruvuma ameuawa kwa kukatwakatwa sehemu mbalimbali za mwili hasa kichwani na mme wa shangazi yake kwa tuhuma za wivu wa kimapenzi.

Habari zilizopatikana jana mchana mjini Songea ambazo zimethibitishwa na kamanda wa polisi wa mkoa wa Ruvuma Deusdedit Nsimek zimesema kuwa tukio hilo limetokea juzi majira ya kati ya saa 3.30 na 4.00 asubuhi huko katika mtaa wa Nonganonga nje kidogo ya manispaa ya Songea.

Kamanda Nsimek alifafanua kuwa inadaiwa siku ya tukio huko katika kata ya Mletele mtaa wa Nonganonga Agatha Honde (55) aliuawa kwa kukatwakatwa sehemu mbalimbali za mwili na kusababisha kifo chake hapohapo na Dickson Mahundi ambaye baada ya kufanya tukio hilo alikimbia na kutokomea kusikojulikana na polisi inaendelea kumsaka.

Alieleza zaidi kuwa katika tukio hilo pia Mahundi alimjeruhi Agatha Honde (22) ambaye ni mke wake kwa kumkatakata na upanga kichwani na kusababisha atokwe na damu nyini kichwani hadi kupoteza fahamu na kwamba kwa sasa amelazwa katika Hospitali ya Serikali ya Mkoa Songea (HOSO) ambako anaendelea kupata matibabu na hali yake bado sio nzuri.

Aliongeza kuwa kulingana na upelelezi wa wali wa polisi umebaini kuwa chanzo cha tukio hilo ni kulipa kisasi ambapo inadaiwa kuwa Mahundi mwaka uliopita alimchumbia Agatha na kumuoa ambaye kwa kipindi cha mwaka mzima alikuwa anaishi naye na kwamba kabla hajamuoa, Agatha alikuwa akiishi na shangazi yake Agatha Honde(55) ambaye alikuwa mlezi wake.

Kabla wanandoa hao hawajaoana Mahundi inadaiwa kuwa alificha tatizo alilokuwa nalo la kutokuwa na nguvu za kiume ambalo lilimfanya ashindwe kufanya tendo la ndoa na mke wake kwa kipindi chote jambo ambalo mke wake alilazimika kwenda kutoa siri hiyo kwa shangazi yake.

Kamanda Msimek alisema kuwa Agatha hivi karibuni aliamua kutoroka kwenda kwa shangazi yake na kumweleza bayana tatizo la mme wake ambapo shangazi yake alipoelezwa aliamua kuwajulisha wazazi wa Agatha na baadaye kiliitishwa kikao cha familia cha pande zote mbili, kwa mwanaumme na mwanamke, ambacho baada ya kulisikiliza tatizo hilo na kuliona kuwa ni gumu kiliazimia kumtafutia tiba asilia Mahundi jambo lililomfanya Agatha abaki nyumbani kwa shangazi yake wakati akisubiri tiba ya asili ya mmewe.

Alisema kuwa juzi majira ya saa 3 asubuhi Mahundi aliamua kuchukua upanga na kumfuata mkewe nyumbani kwa shangazi yake ambako alikuwa akiishi na alipofika alikuta nyumba imefungwa milango yote ambapo majirani walimweleza kuwa wamekwenda shambani kuchimba mihogo jambo lililomlazimu kwenda kuwafuata ambako aliwakuta kisha alianza kuwashambulia kwa kuwakatakata na upanga na inadaiwa shangazi wa mke wake ndiye aliyeanza kupata kipigo na kufa papo hapo na baadaye alianza kumpa kipigo mke wake kilichomsababishia majeraha makubwa mwilini.

Hata hivyo Kamanda Msimek alisema kuwa Polisi inaendelea kumsaka mtuhumiwa ambaye anadaiwa kuwa amekimbilia mkoa wa jirani na kwamba akipatikana atafikishwa mahakamani atafikishwa mahakamani kujibu mashtaka yanayomkabali.

Mganga mfawidhi wa hospitali ya serikali ya Mkoa Dk. Benedict Ngaiza alipoulizwa na Nipashe kwa njia ya simu amethibitisha kuwepo kwa majeruhi Agatha Honde (22) ambaye amelazwa katika wodi ya majeruhi akiwa anaendelea kupata matibabu na hali yake bado sio nzuri wakati maiti moja ya tukio hilo ipo katika chumba cha kuhifadhia maiti ikisubiri kuchukuliwa na ndugu wa marehemu.

Mwanafunzi auawa

Katika tukio lingine mwanafunzi mmoja wa shule ya msingi Mwenge iliyopo katika kijiji cha Mtina Wilaya ya Tunduru Mkoa wa Ruvuma amefariki dunia wakati akipatiwa matibabu kwenye kituo cha afya kijijini hapo baada ya kujeruhiwa vibaya kichwani kwa kupigwa na mchi na mwanafunzi mwenzake Yasin Maya(13).

Akizungumza na mwandishi wa habari hii jana mchana ofisini kwake kamanda wa polisi wa mkoa wa Ruvuma Deusdedit Msimek amemtaja aliyefariki dunia kuwa ni Mohamed Yahaya (15) ambaye inadaiwa kuwa Oktoba 12 mwaka huu majira ya saa 3.30 asubuhi huko katika kitongoji cha Mwenge kilichopo kata ya Mtina Mohamed alifariki dunia wakati anapelekwa kutibiwa.

Alisema kuwa inadaiwa siku hiyo ya tukio Mohamed alijeruhiwa kichwani kwa kupigwa na mchi kufuatia kuwepo ugomvi mkubwa kati yake na Yasin Maya ambaye ni mwanafunzi mwenzake wa shule ya msingi ya Mwenge ambapo alifafanua kuwa ugomvi huo ulifanyika nje ya eneo la shule hiyo ambapo Mohamed akiwa darasa la sita alikuwa na tabia ya utoro na Yasin Maya ni mwanafunzi wa darasa la tano katika shule hiyo.

Hata hivyo, kamanda Msimek alisema kuwa mtuhumiwa Yasin Maya amekamatwa na polisi na upelelezi kuhusiana na tukio hilo unaendelea ili kubaini chanzo cha tukio hilo.

TOA MAONI YAKO HAPA CHINI