WAUZA UNGA UGHAIBUNI WAKAMATWA KATIKA MELI YA TZ, WAICHOMA MOTO

MV Gold Star ikiungua baada ya kuchomwa moto na wasafirishaji wa madawa ya kulevya.

Moshi mkubwa ukitoka katika meli hiyo baada ya wahusika kujitosa majini.

MELI iliyosajiliwa nchini Tanzania ya MV Gold Star juzi Ijumaa ilikamatwa nchini Italia ikiwa na dawa za kulevya zenye thamani ya pauni milioni 50 sawa na shilingi bilioni 126. 5 ambapo watuhumiwa waliokuwa ndani ya meli hiyo waliamua kuichoma moto ili kupoteza ushahidi na kujitosa majini lakini walitiwa nguvuni na wanausalama wa Italia.

Meli hiyo ya mizigo ilikuwa imepakia tani 30 za madawa na ilikamatwa jirani na Kisiwa cha Sicilia katika Bahari ya Mediterania nchini Italia baada ya maafisa uhamiaji kupata taarifa kuwa meli hiyo ilikuwa imebeba kiasi kikubwa cha shehena ya madawa ya kulevya na hivyo kuifuatilia kwa muda mrefu kabla ya zoezi la kuikamata.

 Maofisa wa polisi wa nchini humo wamedai kuwa watuhumiwa hao tisa walikuwa raia kutoka  Syria na Misri ambapo waliisajiri meli yao Tanzania.

Chanzo hicho kimeeleza zaidi kuwa meli hiyo ilifuatiliwa kwa karibu na helikopta na boti za usalama ziendazo kasi jambo lililowashitua waliokuwa ndani ya meli hiyo na kuwafanya wajitose baharini ili kukwepa mkono wa sheria ingawa walikamatwa baadaye kwa vile hawakuweza kuogelea hadi ufukweni kutokana na umbali uliopo kati ya eneo la tukio na ufukweni.

"Meli ilizuiliwa baada ya kupata taarifa za kiintelijensia zilizoonesha kuwa ilikuwa imebeba madawa ya kulevya-lakini hatukutarajia kiasi  kikubwa namna hiyo na wahusika kuichoma moto" alisema msemaji wa uhamiaji Italia.

"Nia yao bila shaka ilikuwa kujaribu kupoteza usahidi ili tusiweze kuwatia hatiani lakini mpango wao haukufanikiwa, moto ulizimwa na madawa ya kulevya yakapatikana baada ya upekuzi" alifafanua zaidi. 

Boti maalumu ziliitwa kwa ajili ya kuzima moto uliokuwa ukiwaka katika meli na baada ya kufanikiwa kuuzima meli hiyo ilipelekwa katika bandari ya Sicilia ambako watuhumiwa hao walipelekwa kwa mahojiano zaidi.

Tukio hili linatokea katika kipindi ambacho Tanzania imekumbwa na wimbi la baadhi ya watu kukamatwa kwa tuhuma za kukutwa na madawa ya kulevya jambo linalozidi kuichafua nchi kimataifa ingawa katika mkasa huu meli inaonekana kusajiriwa Tanzania lakini watuhumiwa wote wanatajwa kutoka mataifa mengine jambo linalozidi kuibua changamoto nyingine kwa vyombo husika.

Chanzo:http://www.dailymail.co.uk/news/

TOA MAONI YAKO HAPA CHINI