UVCCM:JK ATAVUNJA SHERIA ASIPOSAINI MSWADA

 

NAIBU Katibu Mkuu wa Umoja wa vijana wa CCM (UVCCM) Zanzibar, Shaka Hamdu Shaka amesema hakuna wa kumzuia Rais Jakaya Kikwete, asisaini muswada wa mabadiliko ya Katiba.

Amesema iwapo Rais Kikwete, atakubali shinikizo la wapinzani kutokusaini Muswada huo, atakwenda kinyume na kiapo chake cha utiifu na uaminifu kwa Watanzania.

Shaka alisema hayo jana, mjini Unguja, alipokuwa akizungumza na waandishi wa habari akielezea hatua ya Muungano wa vyama vitatu vya siasa, vinavyopinga muswada wa mabadiliko ya Katiba, kutiwa saini na rais.

Akifafanua alisema rais Kikwete, asiposaini muswada huo atakuwa amekwenda kinyume na kifungu cha sheria namba 97, na hivyo atakuwa amepingana na sheria ya Bunge. Na kusisitiza: “Rais hana haja ya kushinikizwa na Wapinzani,”.

Shaka alisema mchakato wa mabadiliko ya Katiba, unaoendeshwa nchini humo, ni kwa mujibu wa sheria na Katiba na hauendeshwi kwa matakwa na utashi wa vyama vya CHADEMA, CUF pamoja na NCCR-MAGEUZI.

Kiongozi huyo wa Umoja wa Vijana wa CCM Zanzibar, pia alisema vyama hivyo vilipaswa kwanza kujenga hoja ndani ya kamati za Bunge na baadaye katika Bunge lenyewe:

“Kitendo cha Wabunge wa upinzani cha kutoka ndani ya ukumbi wa Bunge…ni sawa na kuwadhalilisha na kuwasaliti Watanzania,” alisema Shaka.

Alisema ‘UVCCM’ inao ushahidi wa kutosha kwamba Waziri wa Katiba na Sheria wa Zanzibar, Abubakar Khamis Bakari pamoja na Mwanasheria Mkuu wa Zanzibar, Othman Masoud waliandika mapendekezo ya vipengele vya muswada wa Katiba, vifungu vinne na kuorodhesha kama maoni ya Wazanzibari.

Shaka alisema Abubakar, alitamka kwamba hana tatizo na uteuzi wa nafasi 166 za Wabunge wa Bunge la Katiba kutoka katika maeneo mbalimbali, kama asasi za kiraia na makundi mengine: “Vipi sasa wanamzuia rais asisaini muswada huo?,” alihoji Shaka.

Chanzo: Habari Leo

TOA MAONI YAKO HAPA CHINI