WAZIRI MKUU Mizengo Pinda amesema makampuni
yapatayo 22 yamejiunga na Mpango wa Kupambana na Malaria kupitia sekta binafsi
na sekta ya michezo (Malaria Safe Companies) ikiwa ni kuunga mkono juhudi za Serikali za
kushirikiana na sekta binafsi kumaliza kabisa ugonjwa huo.
Alitoa
kauli hiyo jana usiku (Jumamosi, Februari 9, 2013) wakati akishiriki mjadala
kuhusu juhudi za Serikali katika kupambana na ugonjwa wa malaria uliofanyika
kwenye kituo cha mikutano cha Sandton, kilichopo jijini Johannesburg, Afrika
Kusini.
Amesema
si jambo rahisi kuiachia Serikali peke yake iendeshe mapambano dhidi ya ugonjwa
huo, ndiyo maana Serikali ya Tanzania iliamua kutumia mfumo wa kushirikisha
sekta binafsi ili kuongeza chachu katika kampeni hiyo.
“Ugonjwa wa Malaria hauna mipaka.
Huwezi kusema mbu ataishia Tanzania, Zimbabwe, Malawi au Afrika Kusini tu.
Tunapaswa kuungana pamoja, na mimi natamani kuona nchi zetu zikiungana
kupambana na ugonjwa huu,” alisema.
Alisema mpango huo ulianza mitatu
iliyopita lakini ulizinduliwa rasmi mwishoni mwa mwaka jana. Aliyataja baadhi
ya makampuni hayo ni Bakhresa, Kampuni za Bia za SBL na TBL, SONGAS, NSSF, PPF na
Shirikisho la Mpira wa Miguu (TFF). Tanzania ni nchi ya pili kati ya 12 barani
Afrika zilizojiunga na Mpango huo.
Alilitaka Shirikisho la Soka barani
Afrika (CAF) kutumia fursa ya mashindano hayo yanayofikia kilele chake leo,
lichukulie mapambano haya kama changamoto ya kuziunganisha nchi wanachama wa
SADC katika mapambano dhidi ya malaria kwani katika ngazi ya Umoja wa Afrika
(AU) suala hilo limekwishapiga hatua.
Mjadala
huo uliwashirikisha Waziri wa Afya wa Afrika Kusini, Dk. Aaron Motsoaledi na Naibu
Waziri wa Afya wa Msumbiji, Dr. Nazira Vali Abdulla ambao walihojiwa na
mtangazaji wa habari za michezo wa kituo cha televisheni cha SuperSport, Bi.
Carol Tshabalala ikiwa imebakia siku moja tu kufanyika kwa fainali za Kombe la
Mataifa Afrika (AFCON 2013).
Mjadala
huo uliandaliwa ili kuzihimiza serikali za nchi za Afrika kuongeza juhudi
katika kupambana na malaria ambao unaongoza kwa vifo vitokanavyo na ugonjwa
huo. Mahojiano hayo yatarushwa leo usiku kwenye fainali za michuano hiyo
itakayozikutanisha timu za Nigeria na BurkinaFaso.
Kwa
mujibu wa Shirika la Afya Duniani, takwimu za mwaka 2011 zinaonyesha kuwa kati
ya vifo 655,000 vinavyotokana na malaria kila mwaka, asilimia 91 ya vifo hivyo
inatokea barani Afrika. Na asilimia 86 ya vifo hivyo, huwakumba watoto walio
chini ya umri wa miaka mitano.
Ili
kupambana na ugonjwa huo, bara la Afrika linagharimika kutumia kiasi cha dola
za marekani bilioni 12 kila mwaka zikiwa ni kwa ajili ya matibabu na muda ambao
unapotea kwa wafanyakazi kukosa kufanya kazi au wananchi kushindwa kufanya
shughuli za uzalishaji.
Naye mwanamuziki maarufu nchini Afrika Kusini, ambaye pia ni Balozi
wa Kupambana na Malaria barani Afrika, Bi. Yvonne ChakaChaka ambaye alishiriki
chakula cha jioni mara baada ya mjadala huo, alisema wadau wengi zaidi
wanahitajika kushiriki kampeni hii ifike mahali idadi ya vifo vya watoto
wachanga ipungue.
”Nilipoanza
kufanya uhamasishaji wa kupambana na malaria ni Ethiopia pekee ambao walikubali
kushirikiana nami. Wakati huo kila sekunde 30 mtoto mmoja alikuwa anakufa
kutokana na ugonjwa huo, lakini sasa hivi imefikia kila baada ya dakika moja,”
alisema.
”Zinatakiwa
jitihada zaidi za wadau wote ili ifike mahali tuseme mtoto mmoja anapoteza
maisha kwa ugonjwa huu kila baada ya saa moja, siku moja au kila baada ya wiki
moja na pengine tufike mahali iwe hakuna kabisa vifo vya aina hiyo ,” alisema.
Alisema
anaujua ubaya wa malaria kwa sababu mmoja wa wanamuziki wake alipoteza maisha
kutokana na ugonjwa huo. “Ni lazima tuunganishe nguvu katika vita dhidi ya malaria
la sivyo vizazi vijavyo vitatuhukumu. Tunaweza kumaliza ugonjwa huu, kila mmoja
akitimiza wajibu wake,” alisisitiza.
Waziri Mkuu amerejea nchini mchana
huu na kwenda moja moja Dodoma kuhudhuria vikao vya Chama cha Mapinduzi.
IMETOLEWA NA:
OFISI YA WAZIRI MKUU,
JUMAPILI, FEBRUARI 10, 2013. 
0 comments:
Post a Comment