DAKTA KARUME AHIMIZA WANAFUNZI KUSOMA SAYANSI

Rais Mtaafu wa Zanzibar Dk Aman Abeid Karume akitoa hotuba ya kufungua shule ya Donge Muwanda Kaskazini Unguja katika shamrashamra za kuazimisha miaka 49 ya mapinduzi ya Zanzibar.

Rais mstaafu awamu ya sita wa Serikali ya Mapinduzi ya Zanzíbar  Dkt. Amani Abeid Karume amewataka Wanafunzi wa Skuli ya Sekondari Muwanda kutumia muda wao mwingi  katika masomo ya Sayansi ili kupata Wataalamu wa masomo hayo watakaoendana na maendeleo ya kisasa.

Dkt. Karume ameyasema hayo huko Donge Muwanda wakati wa ufunguzi wa Skuli ya Sekondari ya Donge ikiwa ni shamra shamra za sherehe ya kutimiza miaka 49 ya Mapinduzi ya Zanzíbar.

Amesema Wanafunzi hao wanapaswa kuyapa kipaumbele masomo hayo kwa vile Serikali ya Mapinduzi ya Zanzíbar imegharamika kuleta Walimu wa masomo ya Sayansi  kutoka Nchini Nageria na Skuli hiyo kubahatika kupata Walimu hao.

Amewataka wanafunzi hao kutumia fursa hiyo kushirikiana na wataalamu waliopo ili waweze kufaulu mitihani yao na hatimaye kujiunga na Vyuo vikuu kupitia masomo ya Sayansi.

Dkt. Karume pia amewataka wazazi na wanakamati wa Skuli hiyo kuwahimiza wanafunzi kusoma kwa bidii huku Waziri wa Elimu ambaye pia ni Mwakilishi wa Jimbo la Donge Ali Juma Shamhuna akiahidi kuifanya  Skuli hiyo kuwa ya masomo ya sayansi kwa Wilaya nzima

Mradi wa ujenzi wa skuli hiyo yenye madarasa 12, Maabara tatu,Maktaba moja na Nyumba tatu za Walimu umetokana na Mkopo wa Benki ya Dunia,ambapo pia utajumuisha ujenzi wa Skuli nyingine 27 katika maeneo Mbali Mbali ya Unguja na Pemba.  
(PICHA NA YUSUF SIMAI-MAELEZO ZANZIBAR) TOA MAONI YAKO HAPA CHINI