TUCTA:MAMBO MAGUMU KWA WAFANYAKAZI

Shirikisho la vyama vya wafanyakazi Tanzania TUCTA limesema kuwa hali duni na mazingira magumu ya wafanyakazi yanasababisha kushuka kwa ufanisi mahala pa kazi hivyo kupunguza tija kwa taifa.

 Katibu mkuu wa TUCTA Nicolas Mugaya amesema kuwa wafanyakazi wengi wanalipwa mishahara duni huku wakikatwa kiwango kikubwa cha kodi pia wakijitahidi kupambana na mfumuko wa bei unaopanda kila uchao.

Bwana Mugaya amesema katika sekta binafsi imefikia mtu kulipwa kima cha chini shilingi elfu 70 huku waajiri wakitoa kisingizio kwamba serikali haijaweka kianzio cha kiasi cha mshahara wa kima hicho.

Kuhusu sheria ya mifuko ya jamii ,katibu huyo wa TUCTA amesema kuwa kuna umuhimu wa kuwepo kwa kipengele cha kujitoa katika mifuko hiyo kutokana na kwamba kuna aina ya kazi ambazo wafanyakazi hawawezi kufanya kazi na kufikisha umri wa kustaafu wa miaka 55 – 60.

Imeelezwa kuwa mazingira ya kazi kama vile migodini na ajira za mikataba ambayo mara nyingi mfanyakazi anaweza kuacha kazi kwa sababu za kiafya lakini kwa mujibu wa sheria atalazimika kusubiri fedha zake mpaka umri uliowekwa kisheria .

Katibu huyo amesema kuna madai mengi lakini hawajafanikiwa kuonana na Rais kama walivyoahidiwa mwaka huu hivyo wanaangalia kipindi kingine ambacho wanaweza kukutana kwa ajili ya kujadili madai yao kwa serikali.

TOA MAONI YAKO HAPA CHINI