KUTOKANA
na kuzidi kushamiri kwa matukio ya uhalifu nchini, huku wahusika
wakionekana kutumia sare za Jeshi la Wananchi wa Tanzania (JWTZ), jeshi
hilo limeonya na kupiga marufuku wanaovaa sare za majeshi na kutumia
vifaa vyao.
Taarifa iliyosambazwa na Kurugenzi ya Habari na Uhusiano Makao Makuu
ya JWTZ kwa vyombo vya habari jana, inaeleza kuwa hivi karibuni
kumekithiri kwa vitendo vya uovu huku wahusika wakiwa wameonekana
wamevaa sare na kutumia vifaa vya jeshi hilo.
“Hivi karibuni vichwa vya habari vimetawala sana kwenye vyombo
mbalimbali vya habari sehemu mbalimbali hapa nchini, mara utasikia
‘Mwanajeshi feki mbaroni Tanga’ au ‘Aliyejifanya Afisa wa JWTZ akamatwa
Uwanja wa Taifa Dar es Salaam’ na mengine mengi…
“Pia kumejitokeza kama fasheni kwa baadhi ya wasanii, hasa wanamuziki
mbalimbali hususan wa muziki wa kufoka foka maarufu kwa jina la Bongo
fleva, kurekodi video zao wakiwa wamevaa sare za jeshi kama vile
suruali, viatu, fulana, kaptula, mabegi au kofia,” ilisema taarifa hiyo
na kuongeza.
“Ukirudi mitaani nako hivi sasa kumekuwa na ongezeko kubwa la
wananchi, hasa vijana wanaovaa sare za jeshi, ukiwauliza wanakozitoa
wanakwambia kuwa wamenunua mitumbani ama kwenye maduka ya nguo, ingawaje
ukipita kwa wauza mitumba, nao utakuta wanauza nguo za jeshi ingawa
hufanya biashara hiyo kwa kificho, kwani huziweka sare hizo kwa nyuma
ama ndani kwenye maghala yao, kwa kuwa wanafahamu fika kuwa ni kinyume
cha sheria ya nchi, ingawa wapo baadhi yao ambao huziuza hadharani
wakidai kuwa ni mitumba.”
Taarifa hiyo iliongeza kuwa inawezekana kwa namna moja ama nyingine,
baadhi ya watumiaji wa sare hizo hawafahamu kuwa ni kinyume cha sheria
ya nchi kukutwa nazo, ingawa kutokujua sheria bado sio utetezi mbele ya
mahakama.
Katika kukabiliana na tatizo hili, Katiba ya Jamhuri ya Muungano wa
Tanzania imeweka wazi juu ya uhalali wa matumizi ya sare hizi.
“Mtu yeyote yule asiye na ruhusa ya kushona, kuuza au kuingiza nchini
sare za jeshi, atakuwa ametenda kosa, kwa hiyo atafikishwa mahakamani
na kuhukumiwa kwa mujibu wa sheria zilizopo.
“Katika uvaaji au uingizaji nguo, kama itatokea kwamba nguo hizo
zinafanana kwa aina yoyote ile na zile za Jeshi la Ulinzi la Wananchi wa
Tanzania, ikadhaniwa kuwa ni hizo, mtu huyo ana hatia na anastahili
kufikishwa mahakamani na kuhukumiwa kwa mujibu wa sheria zinazohusu sare
za majeshi zilizopo,” ilifafanua taarifa hiyo na kuongeza:
“Msisitizo uliowekwa hapa katika vifungu vya sheria ni kwamba, sio
lazima ukutwe na sare ambazo zinatumiwa na JWTZ hasha, hapa sheria
inasema hata kama tu nguo hiyo itaelekea kufanana kwa namna yoyote ile
na sare ya JWTZ ni kosa la kisheria kuitumia.
“Na iwapo atapatikana na moja ya makosa yaliyotajwa kuhusu sare,
nguo, viatu, vitambaa, vifungo, beji, au vitu vingine vyovyote
alivyokutwa navyo vinavyohusika na JWTZ, basi kwa kutumia sheria
zilizopo vitu hivyo vitachukuliwa na serikali,” ilifafanua taarifa hiyo.
Ilieleza kuwa mtu yeyote ambaye atampa au kusababisha mtu mwingine
asiyehusika avae sare za JWTZ, atakuwa ametenda kosa na atafikishwa
mahakamani na kuhumiwa kwa mujibu wa sheria zilizopo.
Pia msisitizo wa JWTZ ni kuhakikisha kuwa, sare hizo zinatumika kwa
watu husika tu na hivyo wananchi wanatakiwa kushirikiana katika hilo.
Tanzania Daima
TOA MAONI YAKO HAPA CHINI
0 comments:
Post a Comment