41 TUCTA WAJITOKEZA MBIO ZA URAIS

 

SIKU chache baada ya mwandishi wa habari, Dismas Lyassa kutangaza nia ya kuwania urais wa Shirikisho la Vyama vya Wafanyakazi (TUCTA), wajumbe wengine 40 wameelezwa kujitokeza kuwania nafasi hiyo.

Habari za ndani ya TUCTA ambazo Tanzania Daima imezipata jana, kati ya hao 21 wametoka Chama cha Wafanyakazi wa Afya na Serikali Kuu (TUGHE), na saba kutoka Chama cha Wafanyakazi wa Serikali za Mitaa Tanzania (TALGWU).

Pia kati ya wagombea hao, wanaotajwa kuwa na ushawishi mkubwa wa kuukwaa urais ukiacha Lyassa ni Gratian Mukoba, ambaye kwa sasa ni Rais wa Chama cha Walimu Tanzania (CWT).

Pamoja na kutojiweka wazi wakati wa kwenda kuchukua fomu za kuomba ridhaa ya kuongoza shirikisho hilo ambalo linabeba dhamana ya wafanyakazi takribani wote hapa nchini, orodha ya wajumbe ambayo Tanzania Daima imeipata, inawajumuisha Odongo Silvery, Veronica Paulo, Honest Temba, Amos Kabis, Optatus Silanda, Teresia Yomo, Charles Kayombo, Notburga Maskini, Timotheo Kuchentama na Dk. Stephano Chanangula wote kutoka TUGHE.

Wengine kutoka chama hicho ni Dk. Margreth Mtaki, Shaid Yusuph, Alois Ngonyani, Raphael Mavunde, Rocky Malecela, Gresta Sodoka, Musiba Kasoga, Dk. Idda Ngowi, Lydia Mhina, Bernard Mwingira na Andrew Kyando.

Kutoka Chama cha Wafanyakazi wa Serikali za Mitaa Tanzania (TALGWU), ni Sospeter Omollo, Alex Mkamba, Gerald Msanga, Crispin Kaijage, Frank Chonya, Dinday Njile na Ally Mirambo wakati Chama cha Wafanyakazi wa Bandari Tanzania (Dowuta), wamo Ajuaye Msese, Peter Bugingo na Liyasa Kibeche.

Kutoka Chama cha Wafanyakazi wa Mahotelini, Hifadhi na Majumbani (Chodawu), waliojitosa ni Cosmas Chikoti, Muhsein Shariff na Sospeter Kapanda wakati Chama cha Wafanyakazi wa Mawasiliano na Uchukuzi (COTWU), mbali na Lyassa, wamo Julius Rwabutomize na Juma Ng’imba huku CWT ni Gratian Mukoba na Musa Mnyeti.

Pia vipo vyama ambavyo vimetoa mwakilishi mmoja kikiwemo Chama cha Wafanyakazi wa Strabag (Tamico), kinachowakilishwa na Mbaraka Igangula huku Wafanyakazi wa Sekta ya Huduma za Mtandao wa Mawasiliano Tanzania (Tewuta), kajitosa Jacob Nyajiego.

Tanzania Daima

TOA MAONI YAKO HAPA CHINI