POLISI WADHIBITI USALAMA KWA HOFU YA GHASIA

 

Sheikh Issa Ponda

Polisi mjini Dar es Salam Tanzania, wamedhibiti harakati zozote za wafuasi wa mhubiri wa kiislamu nchini Tanzania Sheikh Issa Ponda ambaye amelazwa hospitali akiuguza jeraha la risasi baada ya kupigwa risasi siku ya Jumamosi mjini Morogoro.

Wakati huohuo katika taarifa rasmi kwa vyombo vya habari, kiongozi wa baraza la waisilamu mkoa wa Dar es Salama (BAKWATA) amesema kuwa kamanda wa polisi mkoa wa Morogoro kulikotokea tatizo la kupigwa risasi kwa kiongozi wa kidini, Ponda ajiuzulu mara moja.

Kiongozi huyo amesema kuwa hapakuwa na haja ya kumpiga risasi Ponda wakati wangeweza tu kumkamata kwani hakuwa ametatiza mpango wowote wa kukamatwa kwake. 

BAKWATA pia limeitaka serikali kuunda tume itakayochunguza kitendo cha kupigwa risasi, kwa sheikh huyo likisema kuwa hapakuwa na sababu ya polisi kutumia nguvu dhidi ya Ponda.

Mnamo siku ya Jumapili, Jumuiya ya Taasisi za kidini za Kiislamu nchini Tanzania imeitaka serikali kufanya uchunguzi wa kina ili kubaini na kuwachukulia hatua watu waliompiga risasi Sheikh Ponda Issa Ponda Jumamosi mjini Morogoro, Mashariki mwa nchi hiyo.

Kwa mujibu wa mwandishi wa BBC mjini Dar es Salaam, Baruan Muhuza, sheikh huyo ambaye amekuwa katika mivutano ya mara kwa mara na serikali ya nchi hiyo alipigwa risasi baada ya kutokea vurugu kwenye mkutano wa mawaidha ya baraza la sikukuu ya Idd el Fitr.

Mwenyekiti wa Jumuiya hiyo, Alhajj Mussa Kundecha, amewaambia waandishi wa habari mjini humo kuwa endapo serikali haitachukua hatua itakayowaridhisha Waislamu, wataamua kufikiria upya mustakabali wao na serikali ya Tanzania.

Sheikh Ponda amelazwa katika hospitali ya taifa, Muhimbili, mjini Dar es Salaam akiuguza jeraha la risasi huku akiwa chini ya ulinzi wa askari kanzu.

Msemaji wa Jeshi la polisi nchini humo Advera Senso ameiambia BBC mjini Dar es Salaam kuwa jeshi lake kwa kushirikiana na jukwaa la haki jinai wameunda kikosi kazi kwa ajili ya kufanya uchunguzi wa tukio hilo huku akikana kuwa Sheikh Ponda alipigwa risasi na polisi.

Senso amewalaumu wafuasi wa Sheikh Ponda kwa kuwazuia askari kumkamata Sheikh huyo kwa kuwarushia mawe; hatua iliyosababisha askari hao kufyatua risasi hewani ili kuwatawanya na hata hivyo wafuasi hao walifanikiwa kumtorosha kiongozi huyo wa kidini.

Taarifa za jumuiya hiyo ambayo inajulikana zaidi Tanzania kama Shura ya Maimamu zinasema kuwa Sheikh Ponda ambaye polisi wanasema walikuwa wakimtafuta kwa tuhuma za kutoa matamko ya uchochezi, alisafirishwa usiku kutoka mji wa Morogoro hadi Dar es Salaam zaidi ya kilomita 200.

Sheikh Ponda kwa sasa anatumikia kifungo cha nje cha mwaka mmoja alichohukumiwa mapema mwaka huu baada ya kukutwa na makosa kadhaa ikiwemo uchochezi wa kuharibu mali za watu.
Chanzo: BBCswahili

TOA MAONI YAKO HAPA CHINI