WAZIRI wa Maliasili na Utalii, Balozi Khamis Kagasheki
WAZIRI wa Maliasili na Utalii, Balozi Khamis Kagasheki amesema
kuwa mgogoro wa ardhi kwa wakazi wa Loliondo unachochewa na maslahi
binafsi ya wawekezaji.
Balozi Kagasheki alimtaja mmiliki wa mtandao wa Shirika la Kimataifa
la Utetezi wa Mazingira (AVAAZ) kutoka Uingereza kuwa anazitumia baadhi
ya asasi nchini kwa maslahi binafsi ili kushinikiza kampuni ya kiarabu
ya Otterlo Business Corporation Ltd (OBC) iliyomilikishwa eneo kihalali
mwaka 1974 inyang’anywe.
Akizungumza na waandishi wa habari jana jijini Dar es Salaam kufafanua
juu ya mgogoro wa ardhi unaofukuta Loliondo kati ya serikali na
wafugaji wa jamii ya Kimaasai, Kagasheki alisema AVAAZ kupitia baadhi ya
asasi na wanasiasa wamekuwa wakieneza uongo kwa wananchi hao.
Waziri alifichua kuwa aliwahi kupigiwa simu na mmiliki wa mtandao huo
kutoka Uingereza akimtaka kufanikisha kumfukuza mmiliki wa Kampuni ya
OBC na kumuahidi kuwa endapo akifanikiwa, yeye atawekeza eneno lote la
ardhi.
“Mimi nilishangaa huyu anayejiita mmliki wa mtandao wa AVAAZ
alithubutu kunipigia simu, kunilazimisha kumfukuza mwekezaji huyo mwenye
asili ya Kiarabu, akasema endapo nitafanikiwa atahakikisha anawekeza
eneo lote yeye kwa kuwa wana tofauti zao,” alisema.
Kagasheki aliongeza kuwa wakati akiendelea kumshawishi alimuuliza
kuwa; “kama ningekuwa Waziri wa Maliasili nchini mwako ungeweza
kuniuliza swali kama hilo?”
Alisema kuwa alimuuliza kama aliwahi kufika Tanzania na anaifahamu
Loliondo, lakini alijibu “hapana”, akaona ni chuki tu ambazo anawatumia
Watanzania katika kuvuruga amani Loliondo.
Waziri Kagasheki alisema mkanganyiko unaotokea hivi sasa ni kutokana
na Waziri wa Ardhi aliyekuwepo mwaka 1994 kugawa hati juu ya hati.
Alisema hata hivyo wananchi wanatakiwa kufahamu kuwa ardhi
wanayoimiliki ni mali ya rais, hivyo hakuna mtu yeyote ambaye anaweza
kumuendesha wala kuiendesha serikali.
“Nasema na endapo serikali itakaa kimya na kuwanyamazia watu kuingia
katika maeneo tengefu yenye vyanzo vya maji, mazalia ya wanyama na njia
ya wanyama basi katika kipindi cha miaka 20 ijayo hakutakuwa na kitu cha
kujidaia,” alisema.
Aliongeza kuwa kila sehemu ina sheria yake na serikali haiwezi ikatoa
uamuzi kwa ajili ya kugandamiza wananchi wake, hivyo kama kutakuwa na
upindishaji wa sheria yeye atakuwa tayari hata kwenda mahakamani na
kwamba anafanya hivyo si kwa shinikizo au kuogopa yeyote.
Kuhusu kauli ya Naibu Katibu Mkuu wa Chama Cha Mapinduzi (CCM) Bara,
Mwigulu Nchemba kuwa serikali ilikosea kumega eneo hilo, Kagasheki
alisema chama hakikumtuma kwenda kutoa uamuzi.
Alisema kuwa Nchemba alitumwa na chama kwenda kuangalia hali ya wanachama wake wamepokeaje msimamo wa serikali.
Waziri alifafanua kuwa hata hivyo hafikirii kama Nchemba angekwenda kule na kutoa uamuzi wowote.
“Nchemba hakutumwa kutoa maamuzi yoyote, ninachofahamu chama kama
chama kimemtuma kwenda kuona wanachama wamepokeaje msimamo wa serikali
na kukusanya maoni yao. Kauli yoyote aliyoitoa ni yake binafsi si ya
chama,” alisema.
Kagasheki pia alizungumzia historia ya Loliondo ambapo alisema mwaka
1974 serikali kupitia Wizara yake ya Maliasili na Utalii kwa kupitia
Tangazo la Serikali No 269, na kwa kuzingatia sera yake ya uhifadhi
inayosifika duniani kote, ilitangaza kwamba kilomita za mraba 4,000
katika eneo la Loliondo litakuwa pori tengefu.
Hivi karibuni serikali ilifanya uamuzi wa kuliondoa eneo la kilomita
za
mraba 2,500 kutoka pori tengefu la Loliondo na kuwapatia wananchi ili
walimiliki kisheria na kuitumia ardhi hiyo kwa hiyari yao kwa ajili ya
kuwaletea maendeleo.
Hata hivyo, alisema kuwa serikali itaangalia namna ya kuwawezesha
wafugaji hao kuanzisha WMA ambazo zitawasaidia katika kujiinua kiuchumi.
Pia alishangazwa na kasi za kuongezeka kwa NGO’s ambazo kwa sasa
zimefikia 37 huku akieleza kuwa hata Wamaasai ambao ni wafugaji, wengi
wao wametokea Kenya si Watanzania.
Chanzo: Tanzania Daima
0 comments:
Post a Comment