HABARI ZA MICHEZO KIMATAIFA

CAF YAFURAHIA ZAMBIA KUTOLEWA –KOCHA HERVE RENARD.

Kocha wa Timu ya Taifa ya Zambia Herve Renard

Mchezaji wa Timu ya Taifa Nigeria- Victor Moses

  Kocha wa timu ya taifa ya Zambia Herve Renard amelishushia lawama shirikisho la kandanda barani Afrika CAF kuwa limefurahia timu yake kutolewa.
Kocha Renard alisema hayo mara baada ya mchezo dhidi ya Burkina Faso kumalizika kwa suluhu na kuinyima nafasi Zambia kutinga robo fainali kwani Nigeria ilishinda na kufikisha pointi tano na Burkina Faso ilitinga robo fainali kwa pointi tano.
Mabingwa wa mwaka jana Zambia maarufu kama Chipolopolo walihitaji ushindi wowote ili kutinga Robo fainali wakati Burkina Faso ilihitaji sare yoyote kutinga robo fainali wakati Nigeria The Super Eagle nayo ilihitaji ushindi ili iweze
kusonga hatua ya Robo fainali. Akizungumza kwa kujiamini kocha Renard alisema
 "uongozi wa CAF utakuwa umefurahi maana ulikuwa unaona kuwa timu ya Zambia haina mvuto wa kuiwakilisha Afrika katika kombe la Mabara na huo ndo ukweli". Aliongeza kocha huyo raia wa Ufaransa.
"Ni vema  kushinda kitu Fulani katika maisha ya soka kuliko kila mara kuishia hatua ya robo fainali bila kushinda taji lolote,huu siyo mwisho wa dunia, leo tumefanya kila tulichoweza lakini huu  ni mchezo wa soka,kila mtu hapa anahuzunika lakini ndiyo soka", kocha Renard aliwaambia waandishi wa habari baada ya mchezo huo kumalizika.
Licha  ya  nafasi kwamba ilikuwa wazi kwa kila timu hesabu zilivurugwa na Burkina Faso na kwa kupata ushindi mnono dhidi ya Ethiopia na kuiweka kileleni timu na kuziacha Nigeria,Zambia na Ethiopia katika wakati mgumu wa kufuzu hatua ya Robo fainali. Golikipa wa Nigeria alisema malaika alikuwa sambamba naye kwani kuna muda alikabiliana na michomo mikali kutoka kwa wahabeshi Ethiopia vinginevyo jahazi lingekwenda Mrama. Nigeria ilikata tiketi ya Robo fainali kuifunga Ethiopia magoli 2- 0
kwa magoli ya penati ya mshambuliaji wa Chelsea Victor Moses katika dakika ya 80 na 90.
 Leo zamu za  Togo vs Tunisia, Algeria vs Ivory Coast.  Timu ya taifa ya  Togo itapambana na Tunisia wakati miamba mingine ya Kaskazini Algeria ikichuana na Tembo wa Afrika Magharibi Ivory Coast ambayo imefuzu robo fainali.
EL CLASSICO:REAL MADRID VS BARCELONA

    Lionel Mess na Christiano Ronaldo

‘Ni vita ya Messi na Ronaldo katika ‘big match big night’
Jumatano wiki hii wachezaji Cristiano Ronaldo na Lionel Messi
wataoneshana nani zaidi wakati wa mechi ya kombe la Mfalme, baina ya timu zao Real Madrid na Barcelona katika EL CLASSICO ya kwanza kwa mwaka huu.
Mechi hiyo ya El Classico itapigwa Santiago Bernabeu uwanja wa
nyumbani wa Real Madrid,katika nusu fainali  ya kwanza wakati  Ronaldo kaweka kambani magoli 21 mpinzani  wake Messi kafumania nyavu mara 33 katika ligi kuu nchini Hispania.
Barcelona wenye pointi 58 wanajivunia pengo la pointi 15 dhidi
mahasimu wao Real Madrid wenye pointi 47 katika msimamo wa ligi kuu nchini humo lakini ni kombe la mfalme maarufu kama Copa Del Rey ni shughuli nyingine pevu.
Ronaldo amefunga magoli 12 katika mechi 10 zilizopita huku Messi akipachika magoli 16 katika mechi 10 zilizopita.
  Endapo Messi atafunga goli dhidi ya Real Madrid atafikisha rekodi ya mkongwe Alfredo di Stefano ya kufunga magoli 18 katika mechi baina ya timu hizo hasimu.
Messi tayari ameweka rekodi ya kipekee kwa kufunga kila mechi katika 11 zilizopita huku akitarajiwa kuandikisha rekodi nyingine siku ya Jumatano.
Klabu ya Real Madrid ilimsajili Diego Lopez kutoka Sevilla kwa pauni milioni 3.5 huku kocha Jose Mourinho akihitaji kuwarejesha kundini wachezaji Xabi Alonso, Sami Khedira, Karim Benzema and Alvaro Arbeloa ambao aliwapumzisha katika mchezo dhidi ya Getafe ambapo walishinda magoli 4 – 0.
Kocha Mourinho atawakosa wachezaji  Sergio Ramos, Angel Di Maria na Fabio Coentrao kutokana kutumikia adhabu ya   kadi nyekundu pia atamkosa beki wake majeruhi Pepe.
Sergio Busquet alisema licha ya Real Madrid kuwakosa baadhi ya nguli wake mechi itakuwa ngumu katika kile wapenzi wa kandanda ulimwenguni wanakiita ‘big match,big night’. 

 SCHALKE 04 YAMSAJILI BASTOS  KWA MKOPO

                                              Michel Bastos
Klabu ya Schalke 04  inayoshika nafasi ya sita katika ligi kuu ya
Bundesliga nchini Ujerumani imemsajili kiungo Michel Bastos akitokea klabu ya Olympic Lyon ya Ufaransa kwa mkopo wa muda mrefu hadi mwaka 2014.
Mkurugenzi wa Schalke 04 Horst Heldt alisema wamefurahishwa na hatua ya kiungo huyo mwenye miaka 29 kujiunga na timu yake huku akitumainiwa kuziba nafasi ya Lewis Holtby aliyejiunga na Tottenham Hotspurs ya Uingereza hivi karibuni.
Kibarua cha kwanza cha mchezaji huyo ni kuivaa timu ya Galatasaray ya Uturuki katika ligi ya mabingwa barani Ulaya hatua ya 16 bora mwezi Februari mwaka huu.
Hata hivyo Galatasaray nayo imejiimarisha kwa kuwasajili nyota wa Ivory Coast Didier Drogba kutoka Shanghai Shenhua na Kiungo Wesley Snejder toka Inter Milan ya Italia.

TOA MAONI YAKO HAPA CHINI