JESHI LA POLISI LAJIPANGA KUDHIBITI UHALIFU

Kamanda Kova

Jeshi la polisi kanda maalum limesema kwamba liko imara kukabiliana na vitendo vya uhalifu hasa katika kipindi cha msimu wa sikukuu za Krismas na mwaka mpya.

Kamanda wa Polisi kanda maalum Dar es Salaam amewataka wananchi kutumia muda huo kusherehekea kwa amani na utulivu huku waumini kutumia muda vizuri kwa ajili ya ibada bila uvunjifu wa sheria za nchi.

Kamanda Kova amesema kuwa wakati wa sherehe za Krismas waumini wa dini ya Kikristo wamekuwa wakiabudu makanisani lakini sherehe huwa na muendelezo katika maeneo mengine ambayo mara nyingine vitendo vya uhalifu hujitokeza.

Katika kuhakikisha ulinzi na usalama unaimarishwa wakati wa sikukuu jeshi hilo limewataka wamiliki wa kumbi za starehe kuhakikisha wanaendesha shughuli zao kwa mujibu wa sheria zilizowekwa huku jeshi hilo likitoa tahadhari kwa wananchi watakaotembelea fukwe za bahari kuwa makini.

Pia Jeshi hilo limewataka wananchi kutoa ushirikiano kwa jeshi  hilo pindi kunapokuwa na ishara ya kutokea kwa uhalifu au vinapotokea vitendo hivyo na askari wako tayari kuwashughulikia kisheria watakahusika na uvunjifu wa amani na utulivu.

TOA MAONI YAKO HAPA CHINI