Dk. Shein akutana na uongozi wa Ofisi ya Rais

STATE HOUSE ZANZIBAR

OFFICE OF THE PRESS SECRETARY

PRESS RELEASE

    

Zanzibar                                               17.12.2012                                                        

OFISI ya Rais  na Mwenyekiti wa Baraza la Mapinduzi imeeleza kuwa miongozo na maelekezo inayoyapata kutoka kwa Rais wa Zanzibar na Mwenyekiti wa Baraza la Mapinduzi Dk. Ali Mohamed Shein imekuwa ni chachu ya mafanikio inayoyapata na kuweza kukabiliana na changamoto zilizopo katika kufikia malengo yaliowekwa.

 

Maelezo hayo yametolewa leo na uongozi wa Wizara hiyo, wakati wa mkutano kati ya uongozi huo na Rais wa Zanzibar na Mwenyekiti wa Baraza la Mapinduzi Dk. Ali Mohamed Shein, katika kuangalia utekelezaji wa Malengo Makuu ya Wizara hiyo kwa kipindi cha Aprili- Juni 2011-2012 na Julai- Septemba 2012-2013.

 

Katika mkutano huo uliofanyika Ikulu mjini Zanzibar ambapo pia, Katibu Mkuu wa Baraza la Mapinduzi na Katibu Mkuu Kiongozi Dk. Abdulhamid Yahaya Mzee na Mshauri wa Rais, Ushirikiano wa Kimataifa na Uwekezaji Balozi Mohamed Ramia Abdiwawa.

 

Akisoma taarifa ya utangulizi ya utekelezaji wa Malengo makuu hayo ya Wizara, Waziri wa Wizara hiyo Mhe. Dk. Mwinyihaji Makame alitoa shukurani za pekee kwa Dk. Shein kwa namna anavyotoa miongozo ya kiutendaji ambayo imesaidia sana kufanikisha utekelezaji wa majukumu ya Ofisi hiyo.

 

Dk. Mwinyihaji,  alieleza malengo iliyojipanfia Ofisi hiyo ambapo miongoni wma malengo hayo ni pamoja na kuendeleza Umoja wa Kitaifa na mashirikiano, kuendeleza jitihada za kufanya mageuzi ya Serikali za Mitaa ikiwemo kufanya mapitio ya mipaka ya maeneo pamoja na kusimamia utungaji wa Sheria na kuimarisha na kuongeza uwezo wa Idara Maalum za SMZ.

 

Malengo mengine ni pamoja na kuratibu na kusimamia ulinzi na usalama, kuimarisha huduma bora katika vyuo vya mafunzo pamoja na kupunguza msongamano, kuimarisha mfungamano wa kikanda ili Wazanzibari waweze kutumia fursa za kiuchumi zinazotokana na Jumuiya za Afrika Mashariki, Jumuiya ya Maendeleo ya Kusini mwa Afrika na Jumuiya nyengine za Kikanda.

 

Aidha, Dk. Mwinyihaji alitaja malengo mengineyo ambayo ni kutoa elimu ya kujikinga na maambukizi ya UKIMWI na VVU, kuratibu utekelezaji wam kiradi ya wananchi, kuratibu shughuli zinazotekelezwa na sekta zikiwemo elimu, afya, kilimo, maji na miundombinu pamoja na kuwashajiisha Wazanzibari wanaoishi nchi za nje katika kushiriki na kuchangia maendeleo ya kijamii na kiuchumi na mengineyo.

 

 Ofisi hiyo pia, ilieleza jinsi inavyoendelea na miradi yake ya maendeleo ukiwemo mradi wa mawasiliano Ikulu, ujenzi na ukarabati wa majengo ya Ikulu na nyumba za Serikali, mradi wa uendelezaji wa vitambulisho, ujenzi wa Chuo kipya cha Mafunzo Hanyegwa Mchana, mradi wa shamba la mbogamboga Bambi na miradi mengineyo.

 

Aidha, Dk. Mwinyihaji alieleza kuwa Zanzibatr imepatiwa heshima kubwa kwa kukubalika kuwa ni kitovu cha lugha ya Kiswahili katika Jumuiya ya Afrika Mashariki.

 

Sambamba na hayo, Zanzibar imepewa nafasi moja ya ajira katika Jumuiya ya Afrika Mashariki ambayo ni ya Usimamizi wa Masuala ya Madawa ambapo nafasi hiyo ameipata Bi Hidaya Juma Hamad wa Zanzibar.

 

Pia, Zanzibar imekuwabaliwa miradi yake katika EAC ambapo mradi wa Uingizaji na Uhamishaji wa bidaa, mradi ambao utaiwezesha Zanzibar  kufanya upembuzi yakinifu katika bandari yake kuu. Ambapo mradi huo pia, utazinufaisha bandari za Dar-es Salaam, Tanga na Mombasa na tayari jumla ya Dola za Kimaerekani milioni 500 zimetengwa.

 

Dk. Mwinyihaji alieleza kuwa hivi sasa Ofisi hiyo inaendelea na mazungumzo kati yake na Kampuni mbili zenye azma ya kusimamia usafi wa miji  ikiwemo Kampuni ya ZANREC Plastic Limited ambayo ina azma ya kuzoa taka zote za plastic.

 

Pia, Kampuni ya SYNCHRONA Waste Management ya Marekani, inatarajia kuzalisha umeme kutokana na taka utakaofikiwa MW 30, ambapo Kampuni hii piam itakusanya kwa makubaliano maalum taka zote za Unguja na Pemba.

 

 Hata hivyo, Dk. Mwinyihaji alieleza kuwa mikakati ya kutatua changamoto za kuwaondosha wanyama wanaozurura mjini, udhalilishaji wa watoto kijinsia na ubakaji katika Wilaya na Mikoa imewekwa  ikiwa ni pamoja na kuunda Kamati ya kusimamia na kuondosha wanyama wanaozurura.

 

Nae Dk. Shein kwa upande wake  alitoa pongezi kwa Wafanyakazi, viongozi na Watendaji wote wa Ofisi hiyo kwa kuendelea kushirikiana pamoja katika utendaji wao wa kazi ikiwa ni pamoja na kuwasilisha utekelezaji wa malengo makuu ya Ofisi hiyo kwa ufanisi mkubwa.

 

Dk. Shein alisisitiza haja ya kuendeleza mashirikiano kwani ndiyo yanayoleta maendeleo kwa nchi na wananchi wake huku akisifu mashirikiano anayoyapata kwa upande wake katika kuwaletea maendeleo wananchi wote.

Rajab Mkasaba, Ikulu Zanzibar.

Postal Address: 2422 Tel.:0777427449. Fax: 024 2231822 

  E-mail: rajabmkasaba@yahoo.co.uk

TOA MAONI YAKO HAPA CHINI