NCCR-Mageuzi yamrejesha Kafulila kundini

David Kafulila

 LICHA ya kuwepo kwa kesi ya kupinga kuenguliwa uanachama katika Mahakama Kuu ya Tanzania, Chama cha NCCR-Mageuzi, kimesema kuwa kiko kwenye hatua ya mwisho ya kumrejesha kundini mbunge wa Kigoma Kusini, David Kafulila.

Kafulila na wenzake sita akiwemo aliyekuwa mgombea urais mwaka 2010, Hashim Rungwe, walifukuzwa uanachama Desemba mwaka 2011, wakidaiwa kukihujumu chama na kutaka kumpindua mwenyekiti, James Mbatia.

Hata hivyo, baada ya NCCR-Mageuzi kuwasilisha barua kwa Spika wa Bunge ili kumtaarifu kuwa Kafulila si mwanachama wao tena, mbunge huyo na wenzake walifungua kesi Mahakama Kuu kupinga uamuzi huo wa chama; kesi hiyo inaendelea hadi leo.

Uamuzi huo wa kumsamehe Kafulila ulitangazwa juzi mkoani Kigoma na Katibu Mkuu wa NCCR-Mageuzi, Samuel Ruhuza, wakati akihutubia mkutano wa hadhara kata ya Nguruka.

Ruhuza aliwaambia wakazi hao kuwa ugomvi kati wa mbunge wao Kafulila na mwenyekiti wa chama, Mbatia, hivi sasa umekwisha kabisa.

“Nataka niwahakikishie wanachama wenzangu kuwa ‘kale kamgogoro mlikokuwa mnakasikia kati ya mwenyekiti na mbunge wenu  hivi sasa kamekwisha’ kabisa, hivi sasa wanafanya kazi kwa kushirikiana kujenga chama,” alisema.

Ruhuza alisema Kafulila alikaa na kutafakari na kugundua kuwa alichokuwa anakifanya si sahihi na hivyo kuamua kuomba radhi.

Alisema kuwa kabla ya kusamehewa alipewa mashariti ya kutimiza vigezo fulani ili msamaha wake uweze kukubaliwa na mpaka sasa tayari mashariti yote ameyakamilisha kwa mujibu wa katiba na taratibu za chama.

Katibu huyo aliongeza kuwa Halmashauri Kuu ya chama hicho ilikaa kikao chake Septemba mwaka jana na kupokea ombi la msamaha wa Kafulila na kulikubali.

“Halmashauri Kuu itakaa tena kikao mwezi ujao tarehe sita na Kafulila atasamehewa rasmi na kuifuta kesi yake. Nataka niwahikikishie wakazi wa Nguruka mbunge wenu ni mtu safi na mchapakazi mzuri, yale matatizo yaliyotokea naamini ni shetani tu alimpitia na hivi sasa yuko sawa,” alidai Ruhuza.

Kafulila ambaye kwa sasa anahesabika kama mbunge wa mahakama, ili aweze kurejeshewa uanachama wake, inatakiwa yaandaliwe makubaliano kati ya chama na wale waliofungua kesi kisha yasajiliwe mahakamani ili kesi ifutwe na chama kifute uamuzi wake wa kuwafukuza.

Chanzo: Tanzania Daima

TOA MAONI YAKO HAPA CHINI