ZANZIBAR KUIMARISHA SEKTA YA UTALII

STATE HOUSE ZANZIBAR

OFFICE OF THE PRESS SECRETARY

PRESS RELEASE

    Zanzibar                                                                           21 Februari,2013

Taarifa kwa Vyombo vya Habari

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein amesisitiza dhamira ya dhati ya Serikali ya Mapinduzi ya Zanzibar kuendeleza na kuimarisha sekta ya utalii Zanzibar kwa kushirikiana na washirika wa sekta hiyo ikiwemo sekta binafsi.

Dk Shein ametoa kauli hiyo leo Ikulu wakati wa mazungumzo na Bodi ya Wakurugenzi wa Jumuiya ya Wawekezaji katika Sekta ya utalii Zanzibar (ZATI) na Jumuiya ya Makampuni ya Watembeza Watalii Zanzibar (ZATO).

“Dira yetu ya maendeleo ya mwaka 2020 inatuelekeza kuwa utalii ndio sekta mama na halikadhalika Mpango wetu wa Kupunguza Umasikini Zanzibar-MKUZA II umetilia mkazo sio tu nafasi ya sekta ya utalii katika kupambana na umasikini bali pia maendeleo yetu kwa ujumla” alisema Dk. Shein.

Katika mnasaba huo Dk. Shein alizipongeza Bodi na viongozi wa ZATI na ZATO kwa ushirikiano wao kwa Serikali na Taasisi zake kama vile Kituo cha Uwekezaji Zanzibar-ZIPA, Mamlaka ya Mapato Tanzania-TRA  na Bodi ya Mapato Zanzibar-ZRB ushirikiano ambao aliueleza kuwa umesaidia sana kukuza sekta hiyo Zanzibar. 

Alibainisha kuwa madhumuni ya kuleta dhana ya utalii kwa wote ni kuhakikisha kuwa kila mmoja anashiriki kwa nafasi yake na mahala alipo kwa namna moja au nyingine katika kukuza na kuimarisha utalii Zanzibar.

“Tunataka kila mtu ashiriki kukuza na kuimarisha utalii kwa sababu ndio sekta yetu kuu ya uchumi na inatufaidisha sote kwa namna moja au nyingine” alifafanua Dk Shein.

Katika mazungumzo hayo ambayo yalihudhuriwa pia na Mshauri wa Rais masuala ya Utalii Ndg. Issa Ahmed, ujumbe wa ZATO na ZATI walibadilishana mawazo na Rais kuhusu masuala ya huduma katika sekta ya utalii, usalama wa watalii, kuitangaza Zanzibar nje kuvutia uwekezaji na kuongeza idadi ya watalii pamoja na haja ya kuimarisha mafunzo kwa wananchi wa Zanzibar ili kuongeza ajira kwa wazanzibari katika sekta hiyo.  

Kwa hiyo alitoa wito kwa wadau wote katika sekta ya utalii na zile ambazo zinahusiana na sekta hiyo pamoja na wananchi kushirikiana kwa hali na mali kukabiliana na changamoto mbalimbali zinazoikabili sekta hiyo muhimu kwa maendeleo ya Zanzibar.

Rais wa Zanzibar na Mwenyekiti wa Baraza la Mapinduzi aliwahakikishia washirika wa sekta ya utalii kuwa milango ya Serikali yake iko wazi kwa majadiliano ya mara kwa mara kuhusu namna bora ya kuimarisha sekta ya utalii nchini.

Katika mazungumzo hayo ujumbe wa ZATI uliongozwa na Mwenyekiti wake Ndg. Abdulswamad Said Ahmed na ule wa ZATO uliongozwa na Mwenyekiti wake Ndg. Khalifa Mohamed Makame. 

Said Ameir, Ikulu Zanzibar

Postal Address: 2422 Tel.:0777427449. Fax: 024 2231822 

  E-mail:sjka1960@hotmail.com

TOA MAONI YAKO HAPA CHINI