TMA: Wananchi wajihadhari kwa Mvua Nyingi

Mamlaka ya hali ya hewa (TMA) imetoa tahadhari kwa wananchi kuwa kutakuwa na mvua kubwa kuanzia Januari 30, 2013 hadi Februari mosi 2013. Mvua hizi, zinatarajiwa kunyesha kwa kiwango cha zaidi ya milimita 50 kwa muda wa masaa 24 kila siku.

 Maeneo yanayotarajiwa kuathirika zaidi ni mikoa ya Rukwa, Iringa, Mbeya, Njombe, Ruvuma, Morogoro, Lindi, Pwani, Mtwara na maeneo jirani na mikoa hiyo.

 Imeelezwa kuwa chanzo cha mvua hizi ni kuwepo kwa kimbunga cha “FELLENG” kaskazini-mashariki mwa Madagascar ambacho kinavuta upepo wenye unyevunyevu kutoka Congo kupitia maeneo yaliyotajwa hapo juu.

 Mamlaka imeendelea kueleza kuwa wakazi wa maeneo hatarishi, watumiaji wa bahari na nchi kavu wanashauriwa kuchukua tahadhari. Aidha taasisi zinazohusika na maafa zinashauriwa kuchukua hatua zinazofaa kukabiliana na mvua hizi.

TOA MAONI YAKO HAPA CHINI