TCRA YAWATAKA WAUZAJI VING’AMUZI KUBORESHA HUDUMA

Mamlaka ya mawasiliano Tanzania TCRA imezitaka kampuni zote zilizopewa leseni za kuuza ving’amuzi kuongeza ubora wa matangazo yao ili kukidhi matarajio ya kuhamia mfumo mpya wa digitali

Mkurugenzi mkuu wa mamlaka hiyo  Prof John Nkoma amesema kampuni hizo zinatakiwa kufanya kazi kwa mujibu wa sheria na kanuni ambazo ziliwapatia leseni ya kufanyia biashara kwa viwango vinavyotakiwa.

Mkurugenzi huyo amezitaka kampuni hizo kutanua wigo wa shughuli zao kwa kufungua na kuongeza sehemu za mauzo ili kukabiliana na wimbi kubwa la wateja wanaohitaji huduma na kutatua matatizo yanayojitokeza mara moja.

Aidha Profesa Nkoma ameviagiza vituo vya Luninga ambavyo havijajiunga na mfumo wa digitali kufanya hivyo mara moja ili kufikisha huduma kwa wananchi kwa wakati.

Mamlaka hiyo inaamini kuwa utangazaji wa Televisheni kwenye mfumo wa Digitali utakuwa chachu kubwa kwa ukuaji wa uchumi wa nchi na kuwaomba wananchi kujiunga kwa haraka katika mfumo huo mpya.

TOA MAONI YAKO HAPA CHINI