YATHIBITIKA KUWA WATU 3 WAFARIKI AJALI YA SUPER-FEO SONGEA

 

  Gideon Mwakanosya, Songea

WATU watatu wamefariki dunia na wengine 24 wamejeruhiwa vibaya baada ya basi waliokuwa wakisafiria kutoka songea kwenda mbeya kumgonga mwendesha baiskeli na baadaye kupinduka.

 

Habari zilizopatikana leo mchana mjini Songea ambazo zimezibitishwa na kamanda wa polisi mkuo wa Ruvuma Mihayo Msikhela zimesema kuwa tukio hilo limetokea jana majira ya saa nne na dakika 45 asubuhi katika eneo la Sanangula nje kidogo na manispaa ya Songea.

 

Kamanda Msikhela amefafanua kuwa ajali hiyo imetokea kwenye barabara ya kutoka Songea kwenda Njombe ambako namba za gari za usajili T273 CDD aina ya Mistubishi Rosa mali ya kampuni ya Super Feo ambalo lilikuwa linatoka Songea kwenda Mbeya.

 

Ameeleza zaidi kuwa basi hilo likiwa kwenye mwendo kasi mbele yake kulikuwa na mwendesha baiskeli ambapo dereva wa gari hiyo aliyejulikana kwa jina la Steven Mbigi (45) baada ya kumkwepa mwendesha baiskeli aligonga mti na kupinduka na kusababisha watu wawili kufariki dunia papohapo.

 

Alisema kuwa mwendesha baiskeli alijeruhiwa vibaya hivyo pamoja na majeruhi wengine walikimbizwa katika hospitali ya mkoa kwa matibabu ambako alifariki dunia akiwa chumba cha wagonjwa mahutihuti wakati madaktari wakiendelea kumpa matibabu.

 

 

Kamanda Msikhela alisema kuwa maiti za watu hao wawili bado hazijatambuliwa lakini maiti zote 2 zimehifadhiwa katika chumba cha kuhifadhia mahiti kilichopo katika hospitali ya mkoa wa Ruvuma ya Songea

 

Amesema kuwa majeruhi wote 24 pia majina yao hayajatambulika na wamelazwa katika hospitali hiyo ambako wanaendelea kupata matibabu.

 

 

Msikhela amesema kuwa chanzo cha ajali hiyo ni mwendo kasi wa dereva wa basi hilo Mbigi mkazi wa mtaa wa Ruvuma Manispaa ya Songea ambaye inadaiwa amekimbia mara tu baada ya ajali hiyo na polisi inaendelea kumsaka.

 

Kwa upande wake Mganga mfawidhi wa Hospitali ya mkoa Dr. Benedictor Ngaiza amethibitisha kupokea majeruhi 25 ambao mmoja kati ya majeruhi hao aliyejulikana kwa jina la Aron Edward ambaye alikuwa amelazwa katika chuma cha uangalizi maalum(ICU) alifariki dunia wakati akiendelea kupata matibabu

TOA MAONI YAKO HAPA CHINI