WANYARWANDA 2000 WAREJEA MAKWAO

 

Mkuu wa Mkoa wa Kagera, Kanali Mstaafu Fabiani Massawe

WAHAMIAJI haramu zaidi ya 2,000 wameondoka mkoani Kagera na kurudi kwao nchini Rwanda

tangu Rais Jakaya Kikwete, atoe siku 14 kwa wahamiaji kuondoka nchini kwa hiari ndani ya kipindi hicho.

 

Rais Kikwete alitoa agizo hilo akiwa kwenye ziara ya kikazi mkoani Kagera, ambapo agizo hilo lilihusu mkoa huo pamoja na Geita na Kigoma. Mbali na wahamiaji haramu, Rais Kikwete aliwataka watu wanaomiliki silaha kujisalimisha kwa hiari yao kabla ya msako mkali kuanza. 

 

Takwimu za kuondoka kwa wahamiaji haramu zaidi ya 2,000 mkoani Kagera, zilitolewa na Mkuu wa Mkoa huo, Kanali Mstaafu, Fabiani Massawe, wakati akizungumzia maandalizi ya kuanza operesheni ya kuwaondoa kwa nguvu baada ya kumalizika kwa siku 14 alizotoa Rais Kikwete. 

 

Massawe alisema hadi sasa taarifa ambazo wamekusanya kuhusiana na wahamiaji haramu wanaondoka kwa hiari yao kwa upande wa Rwanda wamefi kia zaidi ya watu 2,000.Hata hivyo alisema takwimu kutoka nchi nyingine bado hazijafahamika kutokana na wahamiaji hao kupita njia za mkato.”

 

Takwimu za Wahamiaji wa nchi nyingine hazijapatikana lakini wameondoka kwa kiasi chake kupitia njia

za panya,” alisema. 

 

Katika hatua nyingine, Massawe alisema operesheni ya kuwaondoa wahamiaji haramu itaanza wakati wowote kuanzia leo, baada ya kumalizika kwa siku 14 zilizotolewa na rais.

 

Aliwataka wananchi mkoani Kagera kutoa ushirikiano wakati wa operesheni kwa kuwafi chua wahamiaji haramu na watu wanaomiliki silaha kinyume cha sheria. 

 

Alisema ushirikiano wa wananchi ndio utakaosaidia kufanikisha operesheni hiyo ambayo itangazwa na Rais Kikwete katika mikoa mitatu ambayo ni Kagera, Geita na Kigoma.

 

“Operesheni iko pale pale na muda wowote itaanza, baada ya muda waliopewa kukamilika, hivyo ndugu zangu wananchi wa Mkoa wa Kagera tuwe wazalendo kuwafichua wahamiaji haramu,” alisema. 

 

Alifafanua kuwa watakaokamatwa wakati wa operesheni hiyo hatua za kisheria zitachukuliwa dhidi yao ikiwa ni pamoja na kufikishwa mahakamani. 

 

Aliwaomba wananchi wa Mkoa wa Kagera kutoa taarifa za wahamiaji haramu na watu wanaomiliki silaha kinyume cha sheria ambazo zinaweza kusababisha madhara makubwa miongoni mwa wananchi na taifa kwa ujumla.

Majira 

TOA MAONI YAKO HAPA CHINI